Steven和Kea的家

版权声明：转载时请以超链接形式标明文章原始出处和作者信息及本声明
http://skfamily.blogbus.com/logs/27343509.html

    今日又系情人节啦—七月七—中国情人节.不过我记得我地好似从来都未一起过过情人节,首先系2.14,然后到元宵,跟住七夕......虽然收到过chocolate,不过总系觉得miss咗好多啊...有小小遗憾.

    不过虽然系咁,但系同你一起嗰阵,每一日都系情人节啦...因为唔可以成日见面,所以每一次见面都会全心全意咁陪对方,好似糖痴豆咁.每次见到你都有礼物,或者唔会好贵,但系每一样都好有心思...我知道,你一定系花咗好多时间准备噶啦,每一次准备嘅时候,你都会想住我,系咪?咁样点都好过D人求其买扎花来应付呢D节日啊...嗯嗯,原来贵嘅礼物都系准备俾嗰D想偷懒嘅情人嘅.

    我好挂住你!最近屋企成日都发生D唔开心嘅事,我真系好伤心.好多次,我流住眼泪,偷偷地希望你快D带我离开呢个家;另一方面,我又好惊我以后嘅生活都会好似我父母咁,一家人都咁唔开心.

    我知呢个时候,如果我唔系仲感觉你系我身边,我一定支持唔住,所以,无论离我几远都好,千祈唔好离开我.要努力令我幸福,因为我都会努力令你幸福.我一直都唔想令我哋之间嘅感情变的太过现实,我亦都唔想俾太大压力你;但系每当我爸爸妈妈成日为咗嗰一毫几分就互相单打,变都而家咁冷漠,你知唔知我嘅心几难过同几惊.咁你明白点解你话你未谂过呢D问题嘅时候,我会发脾气.

    其实我唔系真系要做阔太,我都会追求自己嘅事业,我都会努力过的好,我只系希望,你同我都可以为一个简单D嘅目标奋斗.我知你有自己远大嘅梦想,但系你知道系你腾飞之前,都需要有一个安稳同幸福嘅家庭作为后盾支持你.

    我亦都唔系要过得几奢华,我净系希望自己嘅子女以后唔会承受父母嘅压力,系佢哋想实现自己梦想嘅时候,唔需要靠别人嘅施舍,唔需要欠其他人,我可以尽自己嘅努力,俾佢哋最大嘅帮助.

    我希望嘅呢D,正系我童年得唔到嘅...

    傻猪,唔小心讲咗咁多添,又搞到你好大压力啦系咪啊?我只系,唔想离开你.

    其实我最想同你讲嘅系情人节快乐.

    虽然未试过一起过情人节,但系如果爱对了人,情人节每天都过!!